Causa Galiza chama as independentistas a participar nas convocatórias da CIG do Dia da Classe Obreira Galega em Vigo e Ferrol

 

Causa Galiza convoca a sua filiaçom e aos independentistas galegos e galegas em geral a participar neste Dia da Classe Obreira Galega nas mobilizaçons convocadas pola central sindical nacionalista em Vigo e Ferrol, duas cidades por volta das que girárom os factos de 1972, que fôrom a alavanca para a construçom e desenvolvimento do sindicalismo nacionalista e de classe.
 
Quanto à deterioraçom da situaçom laboral e sócio-económica que suporta a maioria social galega, achamos que está todo dito: é umha realidade padecida em própria carne por centenas de milhares de pessoas que precisa poucas explicaçons. Desemprego, precarizaçom laboral e vital, salários miseráveis e jornadas inacabáveis, empobrecimento geral, emigraçom, etc. som o pam do nosso dia após dia com o pano de fundo da dependência de Espanha como principal causa explicativa.
 
Mais do que um labor descritivo da realidade, o que corresponde agora ao independentismo é apontar e propor estratégias de superaçom do presente a que nos condena a colonizaçom e a crise capitalista. Causa Galiza acha, neste sentido, que os nossos passos como País devem ir encaminhados à convocatória dumha Greve Geral que abra um tempo de luita e recuperaçom de direitos. Aliás, a socializaçom da necessidade da Independência Nacional é, a nível estratégico, um outro elemento chave.
 
Neste sentido, apelamos aos independentistas e as independentistas a participardes nas manifestaçons convocadas pola CIG em Vigo e Ferrol, incorporando-vos com Causa Galiza à aposta numha Greve Geral e no fortalecimento dumha perspetiva independentista para o nosso País.