Causa Galiza participará na recolhida de assinaturas para a apresentaçom da ILP em defesa do bosque autótone

 

 

Após contatarmos com as promotoras e promotores da Iniciativa Legislativa Popular (ILP) para a Proteçom e Melhora dos Hábitats de Bosque Autótone, a Racionalizaçom da Gestom do Monte e a Luita contra os Incêndios Florestais, Causa Galiza participará na difusom desta iniciativa que, para além de estender e elevar a conscientizaçom da sociedade galega sobre a defesa do território agrário e florestal, exige medidas concretas e viáveis para inverter a atual tendência ecocida que conta com o impulso estatal.

Causa Galiza assumiu a recolhida de 1.500 assinaturas numha primeira fase como parte do esforço coletivo que estám a desenvolver dezenas de coletivos e centenas de pessoas para levar ao parlamento colonial a reclamaçom dumha viragem substancial das políticas florestais, que hoje estám determinadas polas diretrizes da PAC e os interesses das companhias produtoras de pasta de papel -como a ENCE na Ria de Ponte Vedra-, de fibra e, face o futuro imediato, de biomassa.

Animamos a militáncia e o tecido associativo independentista a se comprometer no desenvolvimento da iniciativa porque, embora a sua viabilidade final é incerta, dada a maioria parlamentar que hoje ostenta o neofranquismo na câmara autonómica e a sua submissom servil aos ditados das transnacionais do setor, servirá para elevar a consciência social sobre a problemática agroflorestal e retratar quem desde todas as frentes trabalham na destruiçom da Galiza.

Pode-se consultar informaçom detalhada sobre a ILP nesta ligaçom.