Causa Galiza chama os independentistas a mobilizar-nos na rua neste Dia da Pátria

Como acontece desde 2007, Causa Galiza convoca a tradicional manifestaçom independentista do Dia da Pátria. A cita enquadra-se num cenário excecional: umha crise sanitária que se transforma progressivamente em crise económica e sociolaboral e que é, também, política, pois converge com o momento crítico que vivem o Estado colonial espanhol e o regime político de 1978.

Campanha e mobilizaçom decorrerám sob a legenda Mais independentismo para fazer frente à crise, que assinala onde reside a soluçom estratégica à tentativa dos poderes fáticos de carregar as consequências da pandemia nas costas das classes populares e reconfigurar o regime surgido da Transición, bloqueando, de novo, o exercício do direito de autodeterminaçom e impondo um novo ciclo estatutário.

Campanha informativa de rua

2.000 cartazes, convocatória de assembleias abertas, palestras e trabalho de rua materializarám a campanha informativa da mobilizaçom independentista. De Causa Galiza animamos os e as independentistas a participardes tanto na socializaçom da convocatória como na própria manifestaçom do Dia da Pátria, fazendo da data mais um passo na construçom do projeto político de rutura com Espanha.

Normas de segurança sanitária

A mobilizaçom desenvolverá-se sob as normas de segurança sanitária que o povo galego aplica de jeito generalizado desde a fim do Estado de Alarme. Recomendamos guardar a distância de segurança social e o emprego de máscaras durante o ato para evitar a expansom do coronavírus. A organizaçom arbitrará os meios necessários para o cumprimento das citadas normas.