Causa Galiza convida BNG e NÓS-UP
a umha reuniom para procurar umha mobilizaçom
unitária no Dia da Pátria 2015

Sob o critério guia de procurar a unidade de açom em chave de país entre as forças soberanistas e independentistas a partir da assunçom da existência de distintos projetos e estratégias no campo nacionalista, a nossa Mesa Nacional convidou BNG e NÓS-Unidade Popular a celebrar um primeiro encontro para estudar as possibilidades dumha mobilizaçom conjunta dos setores sociais, políticos e sindicais partidários da auto-organizaçom, o direito de autodeterminaçom e a independência nacional neste Dia da Pátria 2015.

 Na missiva enviada nesta semana, Causa Galiza valoriza que “as tendências dominantes nas últimas décadas neste País se agudiçam sem alviscarmos que a resistência coletiva interposta tenha o vigor suficiente para reverte-las, paralisá-las ou simplesmente ralentizá-las”. Aliás, assinala o “debilitamento do projeto nacional”, o ascenso de opçons e alianças espanholistas, a liquidaçom polo Estado da imaginada via estatutária e a necessidade dumha “explícita aposta independentista e da unidade de açom em defesa do País sempre que esta for viável”.

Diálogo e compromissos

De Causa Galiza assegura-se que “estamos conscientes do importante desnível qualitativo e quantitativo que existe entre as nossas formaçons no que diz respeito à sua força social, política e institucional”, mas, apesar deste aspecto, incide-se na utilidade de “procurar a sua unidade de açom sobre objetivos concretos e compartilhados” sempre que for possível. O formato final desta hipotética convocatória resolverá-se nas próximas semanas após os contatos e diálogos a desenvolver.