Causa Galiza promoverá a configuraçom dum amplo bloco independentista e ruturista no Dia da Pátria 2015

 

Após os contatos mantidos nas últimas datas com BNG, NÓS-UP e distintos agentes sociais e coletivos locais para estudar a possibilidade de celebrar em 2015 dum Dia da Pátria conjunto das forças nacionalistas e independentistas sob os princípios de auto-organizaçom, rutura democrática e independência nacional, Causa Galiza quer fazer público o seguinte:

1º Para responder à demanda das bases sociológicas do soberanismo em favor da unidade de açom em chave de país entre nacionalistas e independentistas no Dia da Pátria, Causa Galiza anuncia a sua predisposiçom positiva ao formato que finalmente possibilite esta unidade embora nom satisfaga na sua totalidade os conteúdos por nós propostos inicialmente.

2º Causa Galiza impulsionará a conformaçom nesta eventual mobilizaçom conjunta dum bloco sócio-político que arvore as reivindicaçons de rutura democrática e independência nacional, como únicas soluçons possíveis ao horizonte de miséria, exploraçom e assimilaçom à que nos condena o domínio da naçom galega pola oligarquia espanhola. Aliás, denunciará a prevista reediçom da fraude política da Transición Española 40 anos após e qualquer colaboraçom galega nesta nova operaçom cosmética.

Causa Galiza rechaça capitalizar politicamente este bloco: alentará a sua conformaçom e renunciará a ser a entidade convocante da campanha e da mobilizaçom. Pretendemos assim que a cessom do protagonismo político facilite a exibiçom do vigor e a amplitude dum espaço sócio-político que, embora desarticulado política e organizativamente, tem umha firme perspetiva independentista e de rutura com o regime espanhol e o sistema capitalista.

4º Causa Galiza disponibilizará os seus recursos militantes, comunicativos e económicos para que a convocatória do bloco independentista ilusione e motive a participar nele e na campanha prévia as centenas de independentistas sem filiaçom desiludidas com a trajetória do nacionalismo hegemónico e dispostas a abrir um tempo novo que progressivamente deixe atrás a atomizaçom, a residualidade e a conflituosidade interna que, no passado, lastrárom as potencialidades do desenvolvimento independentista neste país.

5º Causa Galiza celebrará na tarde do Dia da Pátria a II Romaria Popular, como ponto de encontro e confraternizaçom, programando para além do jantar atividades lúdicas e culturais para todas as idades com especial atençom aos cativ@s.

A nossa mao está tendida com franqueza para conseguir estes objetivos. Chamamos à responsabilidade e à altura de miras para entre todas e todos lançarmos esta ampla campanha independentista que começará com um calendário de assembleias comarcais abertas para sacar adiante a iniciativa de bloco sócio-político pola rutura democrática.

Na Terra, em 23 de junho de 2015


D. M. Q. E.