Causa Galiza chama a que Galiza pola Soberania convoque a única manifestaçom nacional do Dia da Pátria 2014
A organizaçom independentista Causa Galiza, ante o próximo Dia da Pátria 2014, quere compartilhar com todos os patriotas e as patriotas galegas três breves reflexons de urgência e umha proposta política concreta para o nosso dia nacional:
- A Galiza está mergulhada num processo de empobrecimento maciço, espólio territorial e espanholizaçom que compromete a viabilidade do nosso projeto nacional, à vez que gera um excepcional cenário de oportunidades e potencialidades que as forças soberanistas e independentistas, por cima de siglas e partidarismos, devemos aproveitar.

- O Estado espanhol encontra-se também envolvido numha profunda crise económica, de legitimidade democrática e do seu modelo de integraçom das naçons nom espanholas –com um processo independentista unilateral em curso no Principat de Catalunya e passos também unilaterais em Euskal Herria-. É um Estado débil, que recorre sistematicamente à repressom para paliar os seus déficits.

- Em Europa, multiplicam-se os povos que dam passos qualitativos face a soberania e a independência nacionais, únicos cenários que permitem esquivar o horizonte de miséria a que nos condena a Uniom Europeia, o BCE e o FMI. É tempo de superar resignaçons, ambigüidades e impotências e apanhar, nós também, o comboio dos povos livres.

Neste Dia da Pátria 2014, é o momento. O momento de o nosso povo demonstrar que, por cima de falsas saídas a esta crise múltipla, por cima de legítimas siglas e partidarismos e por cima de falsos mesias autótonos e estrangeiros temos a capacidade coletiva de assinalar a única porta de saída a esta situaçom, que é a conquista da soberania e a independência nacionais, e supeditar as nossas diferenças a essa reivindicaçom estratégica comum.

Desde a humildade das nossas forças, mas também desde o patriotismo sincero, Causa Galiza solicita que seja a entidade popular Galiza pola Soberania quem convoque o Dia da Pátria 2014, aunando sem exclusons as vozes e os esforços de todas as mulheres e os homes e de todos os agentes sociais, sindicais e políticos que sabemos que a única via para superar o presente é conquistar a soberania e a independência nacionais com a  construçom do nosso próprio Estado.

Causa Galiza iniciará nos próximos dias e semanas os esforços necessários para que o Dia da Pátria 2014 sirva para encenar, de vez, a madurez coletiva dum povo decidido a colher com força o leme do seu destino histórico.

Alentamos, finalmente, a todos os agentes sociais, sindicais e políticos nacionalistas, soberanistas e independentistas co-responsáveis a fazer os esforços necessários para que o objetivo proposto, que é comummente assumido nas bases sociais do nosso projeto nacional, seja fatível e neste Dia da Pátria umha única manifestaçom percorra as ruas de Compostela.


Na Terra, em 2 de junho de 2014