A Taça Mundial da FIFA 2014 instrumentalizará-se polo Estado nas próximas semanas como umha cortina de fume sobre a sua crise institucional, que já enfila umha Segunda Transición com a abdicaçom de Juan Carlos I de Borbón y Borbón e a entronizaçom do seu filho Felipe VI como próximo Chefe do Estado. Aliás, agitando o chovinismo de massa, servirá para narcótico da consciência social e estimulante do patético nacionalismo espanhol na única frente em que é sucedido.

Simbologia Galega

De Causa Galiza, ante a anunciada proliferaçom de simbologia espanholista em aldeias, vilas e cidades, chamamos a todos os e as nacionalistas e independentistas a nom ceder e respostar com firmeza esta ofensiva pendurando a bandeira da pátria em janelas e balcons, fazendo-a visível em centros de trabalho, ensino, ruas, etc. e denunciando, e desnormalizando, a pé de rua, a presença da simbologia do Estado que nos nega a liberdade como povo.

Comunicado

A nossa Organizaçom, junto a diversos agentes políticos e sociais, assinou o comunicado conjunto que aparece a continuaçom.

Espanha nom nos representa
Galiza nom se joga nada no mundial do Brasil
 
O corrupto regime espanhol emprega demagogicamente a Taça do Mundo de futebol no Brasil para relançar umha nova campanha assimilacionista que nega a nossa existência como povo e naçom.
 
O mesmo voltará a fazer com o passo de “ La Vuelta Ciclista a España” a final do verao.
 
Galiza é a nossa Pátria. Espanha leva mais de 500 anos tentando aniquilar a nossa língua e cultura. Tem empregado todos os métodos possíveis para lográ-lo, mas ainda nom o conseguiu.
 
Perante a campanha de espanholizaçom das nossas ruas e praças com a sua simbologia, reforçada nesta ocasiom com a imposiçom de um novo rei sem consultar a opiniom popular, queremos manifestar:
 
1.- Galiza é umha naçom sem estado. Eis a razom pola que carecem de reconhecimento oficial as nossas seleçons nacionais.
 
2.- A seleçom espanhola nom nos representa.
 
3.- Os símbolos dessa seleçom nom som os nossos. A nossa bandeira é a tricolor branca, azul e vermelha. O escudo da nossa futura República é a conhecida popularmente como sereia, desenhada por Castelao em 1937.
 
Perante a campanha mediática e política do corrupto e apodrecido regime monárquico de reforço do espanholismo e ataque à nossa identidade nacional, as forças e organizaçons políticas, sociais, sindicais assinantes apelamos ao nosso povo a:
 
· Pendurar, exibir e difundir de forma massiva a nossa bandeira nacional durante os eventos desportivos.

· Denunciar a imposiçom da simbologia espanholista em locais públicos e privados.